Séquence liturgique pour Pâques :
Salve dies, / dierum gloria,
dies felix / Christi victoria,
dies digna / iugi lætitia,
dies prima.
Lux divina / cæcis irradiat,
in qua Christus / infernum spoliat,
mortem vincit / et reconciliat
summis ima.
Sempiterni / regis sententia
sub peccato / conclusit omnia;
ut infirmis / superna gratia
subveniret,
Dei virtus / et sapientia
temperavit / iram clementia,
cum iam mundus / in præcipitia
totus iret.
[Insultabat / nostræ miseriæ
vetus hostis, / auctor malitiæ,
quia nulla spes / erat veniæ
de peccatis.]
[Desperante mundo, / remedium,
dum tenerent / cuncta silentium,
Deus Pater / emisit filium
desperatis.]
[Prædo vorax / monstrum tartareum
carnem videns, / non cavens laqueum,
in latentem / ruens aculeum
aducantur.]
[Dignitatis / primæ conditio
reformatur / nobis in filio,
cuius nova / nos resurrectio
consolatur.]
Resurrexit / liber ab inferis
restaurator / humani generis,
ovem suam / reportans umeris
ad superna.
Angelorum / pax fit et hominum,
plenitudo / succrescit ordinum,
triumphantem / laus decet Dominum,
laus æterna.
Harmoniæ / cælestis patriæ
vox concordet / matris Ecclesiæ,
«Alleluia» / frequentet hodie
plebs fidelis.
Triumphato / mortis imperio,
triumphali / fruamur gaudio;
in terra pax, / et iubilatio
sit in cælis.
